____रात्रीच आभाळ फाटलयं____

सप्टेंबर 12, 2008 at 4:47 pm (कविता)

रात्रीच आभाळ फाटलयं
जरा भिजेन म्हणतो…
कर्ज सा-या ढगांच
आजच फेडीन म्हणतो…

त्या विजेचाही मजवरी
आता आरोप नसावा
आज जरा तिलाही
कवेत घेईन म्हणतो..

नको कथा सांगाया?
त्या ओल्या अंगणाची
वळचणीलाच का होईना पण…
जरा अलवार वाहीन म्हणतो

आज तीही वळतेच आहे…
दिशा सांगती सा-या
स्वप्नं पाठमोरी तरी
जरा तिला पाहिन म्हणतो

“चल जाऊ माघारी वेड्या
साद नव्हे आभास आठवांचा”
धरला हात ज्याने त्या
वा-यासवेच अता जाईन म्हणतो

ती म्हणते जाताना “रे सख्या
नको पुन्हा शिंपण शब्दांचे”
इवलेसेच आयुष्य थेंबाचे
जरा ओंजळीत लिहिन म्हणतो

–सचिन काकडे [ सप्टेंबर १०,२००८]
फ़क्त तुझ्यासाठीच ” हा खेळ सावल्यांचा”

© सचिन काकडे

टिप्पणी नोंदवा

तुम्हीe logged in to post a comment.